एमाले नेता "घनश्याम खतिवडा"लाई (गोरे)मार्फत एक्पैसा पनि नलियेको खतिवडाले प्रमाणित गरे ।

लेटाङ । मोरङ क्षेत्र नम्बर १ का सांसद घनश्याम खतिवडाले आफुले सुन तस्कर चुडामणि उप्रेती “गोरे” बाट चन्दा लिएको भनेर विभिन्न सञ्चारमाध्यममा आएको समाचारप्रति आपत्ति जनाएका छन् । न्यूजलयसँग कुराकानी गर्दै सांसद खतिवडाले आफ्नो निष्ठाको राजनीति सिध्याउन चाहनेहरुले हुँदै नभएको कुरा सञ्चारमाध्यममा ल्याएर आफ्नो बदनाम गराएको बताएका छन् ।

सांसद खतिवडाले आफुले गोरेको नाम सुन तस्करी काण्डको समाचार बाहिर आएपछि मात्र सुनेको र त्यसअघि चिन्दै नचिनेको बताएका छन् । ‘गोरेलाई म चिन्दा पनि चिन्दिन, पैसा लिने त परको कुरा हो, अहिले सुन तस्कारको समाचार आएपछि मात्र गोरे भन्ने नाम सुनेको हुँ’ उनले भने, ‘मेरो इमान र निष्ठाको राजनीतिमाथि आँच पु¥याउने षड्यन्त्र अनुसार सञ्चारमाध्यममा प्रचार–प्रसार भइरहेको छ ।’

३८ क्वीन्टल सुन तस्करीका मुख्य अभियुक्त भनिएका मोरङको उर्लाबारीका चुडामणि उप्रेती “गोरे” बाट सांसद खतिवडाले गतवर्ष भएको निर्वाचनको समयमा २ लाख चन्दा लिएको भन्दै विभिन्न अनलाइनहरुमा समाचार आएपछि उनले यसको कडा प्रतिवाद गरेका हुन् । अनलाइनहरुमा समाचार आएपछि धेरैले खतिवडाको आलोचना गरेका छन् भने कतिपयले खतिवडा जस्तो निष्ठावान नेताले यस्तो गर्नै नसक्ने भन्दै प्रतिवाद गरेका छन् ।

सांसद खतिवडाले निर्वाचनको समयमा अरु उम्मेदवारले झैं पार्टीका शुभेच्छुक र कार्यकर्ताबाट मात्र स्वेच्छिकरुपमा सहयोग लिएको बताएका छन् । उनी तत्कालिन नेकपा एमालेबाट मोरङ निर्वाचन क्षेत्र नम्बर १ मा प्रतिनिधिसभा सदस्य निर्वाचित भएका हुन् । उनी सहकारी अभियान्ता समेत हुन् भने सरकारले भर्खरै घोषणा गरेको चूरे फेदी मार्ग (मदन भण्डारी राजमार्ग) संघर्ष समितिका अगुवा समेत हुन् । खतिवडा स्थानीयबासी तथा कार्यकर्ता पंक्तिमा सादा र निष्ठावान नेताका रुपमा चिनिन्छन् ।